یئنی قاپی – ائل بیلیمی
یئمک‌لر/ ساری شیله
ساری شیله : گئنلـده ایچینده‌کی تاخیلی ازیلمیش و بیراز سولو و قاتی اولمایان یئمک‌لره شیله دئیرلر. ساری شیله دادلی یئمک‌لردن دیر اونون اوچون ده آنا یئمکـدن سونرا یئییلَن یئملی‌لردن ده ساییلیر.
ایچینده‌کی‌لر:
دویو
دویونون ایکی قاتی شکر
بادام خیلالی
زعفران
دارچین توزو
قیزیل گول سویو
بیشیرمه‌سی:
دویونو ایکی قاتی سو اینان چوخ یوموشاناجان بیشیریریک. دویو یاخجی یوموشانیب بیراز أزیلمیش دورومونا گلدیگینده شکری آرتیریریق. سونرا قیزیل گول سویو ، بادام خیلالی و دملنمیش زعفرانی یئمگه تؤکوروک. یئمک چوخ قاتیلاشمادان اوجاغـدان گؤتورلنیر. سونرا قاب‌لارا تؤکولوب اوستو دارچین ، بادام ، فیستیق و قیزیل گول قوروسو کیمی زادلارلا بزنیر.
بو یئمگه زعفرانین یاراتدیغی ساری بویاق اوچون ساری شیله دئییلیر.
بیر پارا کیمسه بو یئمگی بیر دیلگه واراندان سونرا پایلاشار. دونیادان کؤچموش اینسان‌لارین خاطیرینا دا بو یئمک قونوم قونشو آراسیندا پایلانان یئمک‌لردن دیر. اونا گؤره ده بو یئمک اؤزل یئمک‌لردن ساییلیر.
نفیس سینافر
This post is also available in: TÜRKCƏ
