یئنی قاپی – ائل بیلیمی
خبرلر_یازی‌لار / هر إو بیر مکتب / ذکیه ذولفقاری
سون باهارین اییـسی گلیرو بو گلیش چوخ شئی‌لری یادا سالیر.یاشلی‌لارین مکتب‌لردن شیرین-آجی خاطیره‌لری اوشاق‌لارین هیجانی ,مکتب‌لرین آچیلیشی ایلا بیرگه اورک‌لرده اولان آنا دیلـده یازیب اوخوماق حسرت و نیسگیلی ! گؤرسن بو حسرت نه زامان بیتجک؟ سویون آخاریندان بللیـدی، نه حسرت ونه نیسگیل‌لریمیز بیتن دگیل. گؤروشن کنده بلدچی لازیم دگیل کی. حالوا حالوا دئمک’له آغیز شیرین اولمور. یای وار قیش وار نه تلسیک ایش وار. سؤز سؤزه گلنده دئییرلر: هله یئکـه موشکول‌لریمیز وار، تلسمه‌یین اودا اولار بیزده قالمیشیق آغیزلارا باخا باخا .رحمتلیک آنامیز دا بئکار اوتورمادی آدام اؤلجک گؤزل توربالار تیکمیشدی نیسگیل‌لریمزه آما توربا دا دولوب داشدی. درد بیر اولسا چکمگه ناوار کی! توربا دا توتار آما بیزیم نیسگیل‌لریمیزه گرک خارال تیکلر. هله هر گونـده تازا درد یارانیر.بیری ائله بو: زیققیلدیا زیققیلدایا زور- بیللاهلا فارسی دیلی اؤرگشمیشک. دده‌میز یانیب اولوب دریمیشیک .آما هله ده راضی اولمورلارکی آی بالا یاخشی دانیشمیسان “ق” لاری “گ” دئیرسن ،لهجه‌ن وار. ایندی بیر یول یومورتانی دویونله بولارا سوز آنلات.آی باجی آی قارداش من تورکم آما أیری اوتوروب دوز دانیشاق سندن یاخشی او دیلی بیلیرم.کیتاب یازیرام شعر دئیرم همده او لهجه ایله…اوزوم یوخاری دئییر نه حامام نه تاس. تویوق بیر قیچلیدی کی بیر قیچلیدی ! سیز آذری سیز و آذری ده فارس دیلینین بیر شاخه‌سی و لهجه‌سیدی. دئییرم آغا آصلا سن دئیه‌ن اولسون قال یاتسین. منیم دیلیم آذری و یا تورکـو دور قالسین هله بوشلا. ایندی من بویام ، دیلیمده بودور. سنده لپه‌نی دئمه، دویونو دئ. دوننی دئمه بویونو دئ. منه بیریول تاپ منده سنه تای آنا دیلینـده تحصیل آلیم …
بوستانچی‌نین قولاغی کار اولار بوستان واختی …
نه ایسه…
دئییر چوخونو قورد یئدی,آما بیزیم کیمین توکو داغیلان اولمادی. اومودسوزلوق شیطان ایشیدی .اؤزوموزه گووه‌نمه‌لی‌یبک. اینسان هر ایشه قادیردی. آنجاق دویون‌لرچوخ ، یولوموز اوزون اولسا بیله ، اینانیرام بو دویون‌لری آچیب , کلفجه‌نین اوجون تاپاریق بیرگون اینشاللاه ! اما گلین أل ایله آچیلان دویونو دیشیله آچمیاق. إله ایش گؤرک نه شیش یانسین نه کاباب .تله‌سن تندیره دوشر دئیبل‌لر !یئریمه‌میش یوگورمک اولماز.آستا و اوستا ایشله‌مک لازیمدی.هرایشی اوزوموزدن باشلاساق چوخ یاخشی اولار.اؤزوموزه اوماج اوووب سونرا اؤزگه‌یه أریشته کسمه‌لی‌ییک. گلین گوجوموزو ییغاق بیله‌ییمیزه ،هر إوی بیر مکتبه چئویرک.عزیز آتا آنالار! آدین قویدون دگیرمانچی چاغیر گلسین کوراوغلو. آتا آنالیق و دیلیمیزه اولان بورجوموزون بیر قیسمین، بئله‌لیکله اؤده‌یه بیلریک .بیر گولویله یاز اولماز بونا منـده اینانیرام.آنجاق یاز اولمایان یئرده بیر ایکی گولون آچماسیدا غنیمتدیر. بلکه یازدا اوتانا بیزیم اؤلکه‌یه گله…
ذکیه ذولفقاری
