یئنی قاپی – ائل بیلیمی
خبرلر-یازی‌لار / رامین جبرائیلی / گووور قیزی
“گووور قیزی”
گؤی تانری اینانجینین تملی توم گوجلرین باشیندا دوران گوجه اینانماق دیر.بو اینانجـدا هر نهیین باشی اولو تانریـیا باغلانیلیر!
–تانری داغ دگیل آما داغ اوندان ساییلیر.
–تانری دنیز دگیل آما دنیز اوندان ساییلیر.
–تانری گونش دگیل آما گونش اوندان ساییلیر
…
گؤی تانری اینانجینـدا هئچ بیر جوره بُت یوخدور! نه فیزیکی بُت وار! نه ذهنی بُت!
گؤی تانرینین انسان دونونـدا اولان پیغمبری ده یوخدور!
“دوغا أن بؤیوک سؤزچودور”
هر نه طبیعتـدن آلینیب آنیلیر.
دوشونه بیلجک هر بیر کس اؤزویله اوندان سؤز إشیدنلرین پیغمبری دیر.
گؤی تانریـدا عبادت یا تاپینماق یاشاییشین متنینده یاشانیلیر. تاپینماق یا عبادت اوچون هر بیر یان تاپیناق دیر. تانری اوچون هئچ بیر بینا تیکیلمهییر! هئیکل یونتانیلمیر! بئله آلقیلانیر کی هر نه آچیق-آیدین دیر!
گیزلی اولان هئچ نه یوخدور! او بیری دونیا بو بیری دونیادان یوخ یالنیز بو دونیادان سؤز گئدیر!
یاخشیلیغـین قاباغی یاخشیلیق! یامانلیغـین قاباغی یامانلیق دیر سؤیلهنیر.
“هر نه تؤکسن آشینا،اودا چیخار قاشیغینا”
“دؤیمه قاپینی،دؤیرلر قاپینی”
“گئجهنین-گوندوزوده وار”
هر باشلانیش بیر قورتاریش،هر قورتاریش بیر باشلانیش ساییلیر!
“ایش-ایشی،سؤز-سؤزو گتیرر”
هر نه آرادان گئدیب یئنیدن دوغولور!
ایشلر آرادان بیر یوللوق گؤتورولمور یالنیز دون دگیشیر!
حیات ابدی دیر! باشلانقیجین تام بللی اولمادیغی کیمی قورتاریش دا تام اولاراق بللی دگیل!
وارلیق یاخشیلیق’لا یامانلیغین بیر-بیرینـدن ایراق یوخ تام ایچ-ایچه یاشاماسیندان اولوشماقدادیر.
هر نه ایجبار اولمادیغی کیمی هر نه ده اختیار دگیل.
“تاری ایکی داشی بیر یئره وورماز“
اؤلوم قورتولوش یوخ باشلانیش دیر!
اؤلنین جسمی ده روحو دا تیکه-تیکه اولور. جسم گلجکـدهکی جسملرده،روح دا او جسم لرین روحولارینین
اولوشماسیندا یئر توتور.
انسان اوغوللاری اولاراق أرکک –دیشیلیک بیر-بیرینـدن اوستونلوک داشیمیر.
أرکک-دیشیلیک بیر گؤودهنین (بدن) ایکی گؤزو کیمی یا بیر آغچانین(سکه) او اوز-بو اوزو کیمی دوشونولور. آغچانین او اوزو بو اوزونه،بو اوزو او اوزونه گرکدیر.
حیاتین بو باشیدا،او باشیدا بو گون قبیر یا مزار آدلاندیردیغیمیز گوووردان باشلانیر!
“گوورن گورو، آناسینین بئشیگی“
انسان اوغلونون گؤودهسینی اولوشدوران هر بیر پارام-پارچا،هر بیر تیکه،هر بیر داملا،هر بیر ذره آنا قارنینـدان قاباق بیر چوخ دؤنملری کئچیریب سون دؤنمی کئچیریب یئنیدن آنا توپراغا قاییتمالارینین دؤنمینی یاشاماق اوچون سون دوراغا انسان شکلینده آیاق قویموشلار!
میللتیمیزین گؤی تانری اینانجینـدا اولماسینین أن گؤرکملی سندی گونو-بو گونه دک یاشاییشیمیزین متنینـده یئر توتان ارثی داورانیشلاریمیز،کند-کند وار اولان گوور قالالاریمیز،تپه-تپه یئرلشن گووور قبیریستانلاریمیز،یئتدی قاتیمیزا ایشلیین میللی اینانجلاریمیز،سینهدن-سینهیه گلن شفاهی ادبیاتیمیز،فرهنگیمیز،تامغالاریمیز،… دیر.
اسلام اینانجینا اینانان هر بیر کسه موسلمان دئییلدیگی کیمی گؤی تانرییا اینانان هر بیر کسه ده گووور دئییلرمیش.
میللتیمیزین اسلام اینانجینا مشرف اولدوغوندان بو اوزه تورلو-تورلو نهدنلردن دولایی گووور آدی کؤک آنلامی اولان گؤیه اولاشماق،بؤیوکلویه چاتمادان آیریلیب کافر آنلامی تاپدیریلمیش!
گونو بو گونده اسلامـدا بلیرلنن قادین حجابینـدان دیشاری چیخیب
“باش توکویله دوزلوک اولماز”
“بورونمک دویونلوک یارادار”
“بیر آزدا أرکک لر گؤزلرینی قوروسون”
سؤیلهین قیزا یا قادینا مؤمنلر «گووور قیزی» سؤیله یرلر.
آرا-سیرادا بویورارلار:
“گووور قیزی چادیرایا سیغماز”
یازار: رامین جبرائیلی اندریان (یاشار)
نفیس سینافر
