یئنی قاپی – ائل بیلیمی
خبرلر_یازیلار / فولکو-یازی / منی تاپانمازسان
ایکی ایل اؤنجه آیین-شایین اوتورموشدوم، بیر اونـدا گؤردوم عزرائیل آدلی بیر گؤزل قاپیـدان گیردی.خوش بئشدن سونرا دئدی :
تئز اول پوست پلنگیوی ییغیشدیر گئدک.!.باشیمـدان بیر قازان قاینار سو تؤکولدو سانکی. دونیا باشیما فیرلاندی .والاهی جان شیرین اولار دئیرلر. باشلادیم یالوار یاخارا.
دئدیم :گل بو داشلاری أتگیندن تؤک ، مندن واز گئچ قوی دویونجا یاشاییم ! منـدن دوواری آلچاق تاپانمادین ؟ نیه ایستی آشیما سویوق سو قاتیرسان ؟ سنه نئینهمیشم ؟ آتیـوا ائششک یا ائشگیوه کؤشک دئمیشم؟ گئت ایللر بویو یورقان دؤشک یورقونو اولان خستهلرین جانین آل اونلاری دینجلت. منیم هله ناواختیمدی ؟ باخما بیرچگیم آغاریب زامانا آغاردیب والاه. ائله یاشیم یوخدی کی. نئجه دئیرلر قورا ایکن مویز اولموشام .یاشامامیشام. هله اوزون-اوزون آرزیلاریم وار . موسلمانین سونکی عاقلی دئیرلر ، بو یاشـدا قلم گؤتوروب جیزما قارایازیرام. مجال وئر نئچه گؤزل کیتابلار یازیم ،یارادیم ،ترجمه ائدیم …قوی اوغول-قیز تویو گؤروم.نوه م ساچیمی یولسون. گلین کورکن نازی چکیم. سونرا بو مئیدان بو شیطان. بوینوم قیلـدان نازیکدی.اؤلمویَن شرفسیزدی .بیردن دلی دومرول یادیما دوشدو .آما تاسف’له منیم اونون سئوگیلیسی تای سئوگیلیم یوخدو کی منیم عوضیمـدن اؤلمهیه حاضیر اولسون. دئدیم …
قالدیم کسیله کسیله….
دئدی : یازیق بالا،سن اوخویانلاری من توخوموشام.مگر بیلمیرسن یاتان اؤلمز یئتن اؤلر. هئیی..
چوخ آغاجلار اوسته شوولر دوغرانار…
یوز ایلـده یاشاسان بئله دونیادان دویماسان.
دئییرلر یئماق’لا (یئمک’له) دویمامیسان یالاماق’لا نئجه دویاجاقسان؟
دور دا گئتملی قوناغین تئز گئتمسی یاخشیدی.
دئدیم: یاخشی دا سنـده ده سوچ یوخدو .مین ایشچینین بیر باشچیسی اولار .آغا دئییر سور درهیه سورک دا. آنجاق ائشیتمیشم سن پاسور اویناماغی چوخ سئورسن. گل اوتور بیر ایکی أل اوینویاق گئدریک. یای وار قیش وار نه تلسیک ایش وار.
نه باشیزی آغریدیم کی بیر ایکی ایل پاسور اوینویانـدان سونرا کور توتدوغون بوراخماز کیمی بو دا یاپیشدی یاخامدان آسلاندی.
منیمده گؤنوم قالیندی ها دگیرمانین بو باشینـدان اؤلو سالسالار او باشیندان دیری چیخارام..بو تئزلیکـده تسلیم اولان دگیلَم کی.
بو دفعه دئدیم : بیزیم گيزلن تاپ اویونوموز وآر .چوخ شیرین اویوندور.
سن گؤزلرین یوم من گیزلنیم. منی تاپسان گئدک دا.
او گؤزلرین یومـدو من دابانا قوت قاچ کی قاچاسان.
اینانمیرام بو تئزلیکده منی تاپا…..
یازار : ذکیه ذولفقاری
نفیس سینافر
This post is also available in: TÜRKCƏ
