یئنی قاپی – ائل بیلیمی
اینانجلار / آل آروادی
آل آروادی
آذربایجان فولکلوروندا آل آروادینین آدی چوخ تانیش آدلاردان دیر و دئمک اولار هامی اونون آدینی ائشیدیب. کوتله اینانجلاریندا هر زمان اونون آدی گلسه، کسین بیر یئرده جنایت ائدیب قان تؤکهجک. بو اوزدن آل آروادینی “آدی باتمیش” دئیه تانیتدیرارلار. هر حالـدا “اوجا بویلو قورخونج بیر قادین دیر، دؤشلری او قدر اوزون دور کی، هرهسینی بیر چیگینینه آتار. یاخالانیب دمیر بیر سانجاق ایله توزاغا دوشسه یورولمادان- اوسانمادان ایشلهیر؛ بونلار هامیسی آل آروادینـدان اولان ذهنیت دیر بیز آذربایجانلیلاردا.
اما بونونلا بئله کئچمیشده، بویلو قادین اولان هر إوده، اوشاق دونیایا گلندن سونرا، آل آروادینین زاهینین پوسقوسوندا اولماسین اویاری وئرردیلر. بو اینانجلاردا قادین بویلو اولارکن آل آروادی اونا بیر ایش گؤره بیلمز، هم ده بویلونون اونا اؤنمی بیله یوخدور بلکه او زاهینی ایستر. زاهینین ایچینده بیر شئی وارکی، آل آروادی اونو چیخاردیب یئمک ایستر هر زمان! و بو ایشی گؤرمهیه تکجه بیر زمان ایمکان تاپا بیلر، او دا زاهی یاتاقـدا یاتاندا آل آروادینین چاغیرماغینا “هن” و یا “بلی” دئیهرک جواب وئرسه. بو حالدا آل آروادی ایستهدیگی شئیه ال تاپیب، زاهینین ایچیندن اونو اوزوب آپاریب سودا یویوب یئیر، بئلهلیکله زاهینین اؤلومونه سبب اولار. إله بونا گؤره ده زاهینین دؤرهسینه جیزیق چکرمیشلر، اونون یاخاسینا سانجاق سانجاردیلار، کؤرپهنین باشی اوسته دوز- چؤرک و زاهینین باشی اوسته کسر پیچاق یا قیلینج قویارمیشلار. زاهی بیر یئره گئدنده اونو یالقیز قویمازدیلار، اگر تک اولسایدی ألینه بیر کسر اوراق یا پیجاق وئرردیلر. هم ده زاهی إوده یاتیب دینجهلن زمان اونو گودردیلر اؤز- اؤزونه دانیشماییب یوخو هاواسینا “هن” یا “بلی” دئیهرک بیرینه جواب وئرمهسین. اگر زاهی ساییقلاییب اورگی گئچسهیدی هامی أل-آیاغا دوشردی. بو چوخ پیس علامت ایدی. اوندا وقتی ایتیرمهدن قاپی آغزیندا ایت بوغوشدوراردیلار، توفنگ آتیب، آت کیشنهدردیلر. بو ایشلر آل آروادینی قورخوتماق و زاهیدان قوپارتدیغی شئیی سویا یئتیره بیلمهمهسی اوچون گؤرولرمیش. عئینی زماندا بیر نفر چئویک شخص اوراق یا قیلینج گؤتوروب بولاغا قاچیب سویو قیلینجلارمیش.
یازار : گونش امانی
نفیس سینافر
